Þorbjörn

Skrapp um daginn upp á fjallið/fellið eða hólinn Þorbjörn í Grindavík. En ég er á nýjan leik á leiðinni upp á Hvannadalshnjúk svo það veitir ekki af að æfa sig aðeins fyrir þá ferð. Reyndar er mjög auðvelt að klífa upp Þorbjörn.  En um er að ræða móbergsfell sem er 243 m yfir sjávarmáli og þaðan er mikið útsýni yfir Reykjanesfjallagarðinn. Uppi á fellinu er gjá eða sprunga sem heitir Þjófagjá, að sögn eftir 15 þjófum sem höfðust við í gjánni og stálu fé Grindvíkinga.  Voru þeir síðast unnir með prettum að því er sagan segir.  Á Þorbjarnarfelli fórst í flugslysi í síðari heimstyrjöldinni C. Andrews, yfirmaður alls herafla Bandaríkjamanna á Norður-Atlantshafssvæðinu, ásamt fleiri háttsettum foringjum.  Voru þeir að koma vestan frá Ameríku til lendingar á Keflavíkurflugvelli en flugvélin hefur sennilega flogið of lágt.  Aðeins einn maður komst lífs af úr þessu flugslysi og beið hann björgunar á annan sólarhring. (Heimild http://www.reykjanes.is/Um_Reykjanes/Fjoll/THorbjorn/) Ekki veit ég hví maðurinn þurfti að bíða svona lengi eftir björgun.

En fleiri myndir úr ferðinni má sjá í myndaalbúminu með því frumlega nafni Þorbjörn.

Athugasemdir

[Hörður Agnarsson, 2.5.2008 kl. 22:09]

Mikið er gott að þú sért á leiðinni upp á Hnjúkinn  En ég er búinn að vera að safna að mér allskyns dóti fyrir fjallaferðir eins og skíðagleraugum broddum o.fl. og þér er velkomið að fá þetta lánað