Litháen, The Hill of Crosses, Kryzių Kalnas

Eins og áður hefur komið fram á þessari síðu þá fór ég í ferðalag til Litháens sumarið 2005. Þar sá ég þá alflesta krossa sem ég hef séð á minni ævi samankomna á einni og sömu hæðinni. Hér má sjá fleiri myndir af þessum merkilega stað sem ég tók er ég var staddur þar.

En þessi staður heitir á ensku The Hill of Crosses. Á smá hæð standa fleiri þúsund krossar. Allavega tókst mér ekki að telja þá. Þarna eru krossar af öllum stærðum og gerðum. Frá því að vera 3ja metra háir niður í að vera pínulitlir hangandi á öðrum krossum.

Þessi staður er seinnilega álíka mikilvægur fyrir Litháana og þingvellir eru fyrir íslendinga.

Talið er að fyrstu krossarnir hafi byrjað að koma eftir uppreisn bænda 1831-1863. 1895 voru krossarnir taldir vera um 150 stk. Síðan hafi þeim smáfjölgað, 1940 verið um 400 stórir krossar og þúsundir minni.

Allavega þrívegis hefur þessi staður verið jafnaður við jörðu af Sovéska hernum, en það voru árin 1961, 1973 og 1975. Þá voru krossarnir brenndir til grunna og járnarusl og skolp huldi svæðið. En staðarbúar og pílagrímar allstaðar að úr Litháen komu jafnskjótt aftur og settu aftur upp krossa.

Í dag koma pílagrímar allstaðar að úr heiminum á þennan stað. Meðal annars kom Páll Páfi II þangað í september 1993.

Hér getið þið séð heimasíðu um þennan merka stað.

Í dag tengja íslendingar því miður of mikið af slæmum hlutum við Litháen en þar er margt fallegt að sjá og gott fólk einnig. Gleymum því ekki.

Skaðlegur

Jæja gott fólk, ég er búinn að komast að því að ég er sérlega skaðlegur umhverfinu, í raun er ég svo skaðlegur að réttast væri að loka mig inni og henda lyklinum. Nú í fyrsta lagi er ég í gönguklúbbinum Leifur Lost. Við förum reglulega út að ganga, göngum reyndar mislangt. En skv. þessari frétt þá væri í raun betra ef við færum út í bíltúr. Við sem höfum verið að telja okkur trú um að þetta væru heilsubótargöngur, en þá erum við bara að menga umhverfið. Þekki reyndar einn sem hjólar alltaf í og úr vinnu. Sá hlýtur að vera með slæmt samviskubít núna. Vá maður!!!!!!!!! Hann á sér varla viðreisnar von.

Nú ekki nóg með að ég sé í gönguhóp, neeeiiiiiii, ég skildi lika hér um árið!!! það ku víst vera sérlega slæmt umhverfinu samkvæmt nýjustu rannsóknum frá Bandaríkjunum. Þá vitiði það, það er eins gott að sambandið haldi, alveg sama hversu slæmt það er!! því ekki viljum við vera skaðvaldar í umhverfinu.

Nú svo ek ég leigubíl yfirleitt um helgar, það hlýtur að vera skaðlegt umhverfinu, sérstaklega þegar kalt er úti og maður lætur vélina ganga til að halda hita á sjálfum sér og bílnum.

Ég ek um á 7 ára gömlum golf með 2ja lítra vél. Auðvitað ætti ég nú bara að fá mér einhvern pínulítinn sparneytin bíl. Yfirleitt er ég hvort eð er einn að þvælast í bílnum. Ekki gott.

Að vísu fer ég með dósirnar í endurvinnslu, en til þess þarf ég að keyra 30 km. hvora leið, alls um 60 km. Þar sem ég bý á Bifröst og næsta endurvinnsla er í Borgarnesi. Spurning hvort að ég sé ekki bara að skaða umhverfið með að fara með dósirnar.

Er hægt að vera öllu skaðlegri?

Lítlir og stórir bílar

Á þessa bíla rakst á ég í Borgarnesi síðasta sumar. Skyldi litli Fiat-inn komast inn í Econlinen?

 

 

 

 

Þennan lögreglubíl sá ég í Litháen sumarið 2005. En þarna voru þeir á gatnamótunum við hraðamælingar. Einhvern veginn efast ég um að þeir geti elt hraðskreiðustu bíla borgarinnar. Því þarna sá maður líka nýlega BMW. En lögreglan var allavega nægjusöm á sínum gamla Golf. Held meira að segja að minn Golf sé bæði nýrri og jafnvel með stærri vél.

 

 

Eitthvað var verið að framkvæma í miðbænum. Likt og er oft gert í miðbæ Reykjavíkur að sumri til. Þessi mynd er einnig frá Litháen og tekin sumarið 2005. En lengi má nýta gamla trukka eins og sést á myndinni. En hvaða árgerð og hvaða tegund þessi bíll er hef ég því miður ekki hugmynd um.

Kynbundið ofbeldi

Ég hef aldrei skilið þegar karlar berja konur sínar, eða konur berja karlanna sína. Það er víst til líka. Hví er fólk saman ef það ber ekki meiri virðingu fyrir maka sínum, eða sjálfum sér að það þurfi að slást? Þekki því miður of mörg dæmi af fólki sem er saman eða hefur verið saman sem á alls ekki að koma nálægt hvort öðru. Í því tilfelli sem ég þekki til þá kemur áfengi mikið við sögu. Í raun ættu viðkomandi að hætta að drekka, en hvort að það leysir allan vandann skal ég ekki segja til um. En ég ætla ekki að ræða það mál né kommentera neitt á það. Hinsvegar rakst ég á bloggsíðu á netinu, sem er reyndar á sænsku,  þar sem að kona er að segja frá sínu máli. Hvernig hún tekst á við lífið í dag eftir að hafa búið með ofbeldismanni. Lýsir hræðslu sinni, hvernig hún eigi erfitt með að sofa á nóttunni, sem er ekki skrýtið, því í einni færslunni er til dæmis gluggi brotinn er grjóti er kastað inn og á grjótinu stendur "du är död", þú ert dauð.!!! Hér er slóð á heimasíðuna sem ber heitið words of a woman.

Hvernig væri að fólk væri vinir hvers annars. Kannski soltið væmin færsla, en ég hef of oft keyrt fólk sem hefur verið að slást, ekið konur í kvennaathvarfið og eins ekið konum heim sem hafa verið með gróðurauga og marin og blá. Sem hafa beðið mig um að bíða, ef ske kynni að þær þyrftu að flýja aftur út af sínu eigin heimili. Þetta er alltaf jafnsorglegt að verða vitni að svona löguðu.

Best að aflýsa próflestri.

Var að lesa stjörnuspánna mína áðan og sá að ég verð bara að hætta próflestri hér og nú. En ég er í Sporðdrekamerkinu og spáin er eftirfarandi:

Sporðdreki: Vertu góður við sjálfan þig. Líkaminn þinn er að segja þér að hvíla þig. Ekki ýta á hann. Verkefnin mega bíða þangað til þú hefur næga orku í þau.

Ætli ég verði ekki bara að taka eitt Mike á þetta!!!!! Við sem erum við ML-nám hér á Bifröst núna vitum hvað það þýðir að taka Mike á hlutinn, en fyrir ykkur hin þá þýðir það að við tökum okkur bara þann tíma sem okkur þóknast í hlutinn. En það eru að verða komnar 5 vikur frá því að Mike átti að skila til okkur einkunn fyrir próf sem við tókum hjá honum fyrir tæplega 7 vikum síðan. En sú einkunn skilar sér vonandi áður en árið er liðið og þó!!!!

 

Helgisaga

Jæja, ákvað í þetta sinn að blogga um hvað dreif á mína daga um helgina og hvað ég varð vitni að. Var að vanda að keyra leigubílinn um helgina, en hefði í raun átt að vera að lesa fyrir prófin. Las samt sem áður eitthvað líka.

Varð vitni að því er tveir dyraverðir á einum veitingastað bæjarins tóku sig til og skelltu mann í jörðina og héldu honum niðri. Ekki veit ég hvað blessaður maðurinn gerði af sér eða hvort að dyraverðirnir hafa tekið of harkalega á málinu. Allavega lá maðurinn þarna í jörðinni með tvo fíleflda dyraverði ofan á sig. Þetta var snemma kvölds, langt fyrir miðnætti.

Einn aðili reyndi að stinga af frá mér, aðili sem ég hef ekið nokkrum sinnum, aldrei verið neitt vandamál á honum fyrr en nú. Var auðsjáanlega eitthvað ílla fyrirkallaður. Yfirleitt ræðir hann um að öreigar allra landa eigi að sameinast, er sem sé hallur undir kommúnisma að ég tel. Ég leyfði nú viðkomandi bara að fara enda upphæðin mjög lá, en hringdi í hann daginn eftir. Komst sem sé að því hvað hann heitir. Manngreyið varð alveg eins og aumingi og viðurkenndi sitt brot og ætlar að greiða sitt far eins og manni sæmir.

Nú svo var ég að aka upp brekku í austurbæ Reykjavikur er bíll kemur niður sömu brekkuna og eitthvað verður til að ökumanninum verður eitthvað á, rekst á stein sem er utan vegar og ég sé bílinn takast á loft og endar svo á hvolfi. Vildi svo heppilega til að einn af farþegunum hjá mér var starfandi hjúkrunarkona. Betur fór en á horfðist og slapp ökumaðurinn, lítið eða algjörlega ómeidd, ásamt litla hundinum. En hinsvegar sá ég þarna að ég þarf að drífa míg aftur á skyndihjálparnámskeið. Ár og öld síðan að ég hef farið á slíkt, seinnilega fór ég síðast á skyndihjálparnámskeið á Nýja Sjálandi 1986! Góðan daginn. Mæli með því að allir fari á skyndihjálparnámskeið reglulega.Verð að taka mig á í því efni. En ég hringdi strax í neyðarlínuna, lögregla, slökkvilið og sjúkrabíll koma á vettvang skömmu síðar. En lögreglumaðurinn sem tók niður nafnið mitt, kunni auðsjáanlega ekki að skrifa Leifur!! En hann skrifaði Leyfur, ég leiðrétti hann nú hið snarasta. Vonandi góður lögreglumaður  þó svo að hann sé ekki góður í stafsetningu.

Nú svo fékk ég freistandi boð frá tveim eldri konum. Þær hafa nú verið allavega tíu til fimmtán árum eldri en ég. En þær buðu mig í threesome!!! En þeim fannst ég svo sætur að sögn. Gaman að því. En ég afþakkaði pent gott boð og þær borguðu bílinn með reiðufé. Ekki veit ég hvað þær hefðu gert ef ég hefði sagt já!!!!!!

Nú svo sá ég að einhver/einhverjir hafa áhuga á að gerast öskukallar. Allavega var búið að leggja tvær ruslatunnur snyrtilegar á miðri miklubrautinni. Sá reyndar ca. hundrað metrum frá tunnunum þrjá prúðbúna drengi ganga í átt að miðbænum á leið á djammið. Veit ekki hvort að þeir komu nálægt þessu eður ei. Skil samt ekki hver fær þörf á að fara með ruslatunnurnar á miðri götu um miðja nótt. Ég hef allavega lítinn áhuga á að koma nálægt slíkum tunnum meira en þörf er á, en bendi viðkomandi aðila/aðilum á að fá sér vinnu hjá t.d. sorphirðu Reykjavíkurborgar. Gæti best trúað að þeim vanti ávallt góða áhugasama starfsmenn.

Keyrði konu heim til sín sem var eitthvað ósátt við sinn eiginmann og hafði skilið hann eftir. Á áfangastað kom í ljós að konugreyið var bæði peningalaus og lyklalaus, en ok, hún bað um að fá að vekja börnin sín og sækja kreditkortið sitt sem væri innan dyra. Hófst hún nú handa við að hringja í krakkana en þau svöruðu ekki, enda steinsofandi. Fór konan þá út og barði á gluggum og hurðum. Þarna horfði ég á virðulega konu (eldri en ég) taka þvílík högg og spörk á hurðir og glugga að hver karlmaður hefði getað verið stoltur af. Þetta tók smá tíma en á endanum tókst henni að vekja einhvern krakka sem hleypti henni inn þannig að hún komst inn og gat gert upp við mig. Ekki veit ég hvernig móttökur eiginmaður hennar hefur fengið er hann kom heim........

En svo var að sjálfsögðu einnig rómantík í bílnum að vanda. Bara gaman að því.

Spakmæli helgarinnar á svo strákur sem sagði óvart "maður á ekki að drekka undir áhrifum áfengis.!!!". En hann ætlaði að segja maður á ekki að keyra undir áhrifum áfengis.  Enda tók hann leigubíl í stað þess að aka sjálfur.

En núna er best að demba sér í próflestur.

Góðar stundir.

Athyglisverður erlendur dómur

Var að spá í að skrifa um femínistaefnið bleikt og blátt, en þá rakst ég á þessa dóma og ákvað að það væri mun skemmtilegra að skrifa um þá en hið margumritaða efni, hvort að börn eigi að vera klætt í bleikan og bláan lit við fæðingu.  En öll munum við eftir Brennu-Njálssögu og Gunnari á Hlíðarenda en hann beið bana þar sem að kona hans Hallgerður langbrók neitaði að gera honum lokk úr hári sínu.

„Gunnar mælti til Hallgerðar: „Fá mér leppa tvo úr hári þínu og snúið þið móðir mín saman til bogastrengs mér.“ Hallgerður svarar á móti: „Liggur þér nokkuð við?“ Gunnar mælir: „Líf mitt liggur við, því að þeir munu mig aldrei fá sóttan meðan eg kem boganum við.“

En þessir tveir dómar hér að neðan eru kannski að hluta til skyldir atburðarásinni hjá Gunnari nema hvað þeir gerast mun síðar.

Málsatvik eru sambærileg í báðum málum og gerast í og rétt eftir seinni heimstyrjöldina. Um var að ræða þýska hermenn sem voru heima hjá sér í stutt leyfi. Konur þessara hermanna hafa seinnilega verið orðnar leiðar á mönnunum sínum, allavega þá tilkynntu þær til yfirvalda að mennirnir hefðu haft óviðurkvæmileg orð um Hitler og Nasistastjórnina. Þær vissu mæta vel að þetta myndi hafa afar alvarlegar afleiðingar fyrir viðkomandi aðila og væntanlega yrðu þeir dæmdir til dauða. Í báðum tilvikum voru þeir dæmdir til dauða, en í stað þess að framfylgja dómnum þá voru þeir í staðinn sendir til Rússlands til að berjast í fremstu víglínu. Enda var mikið mannfall þar og ansi ólíklegt að þeir kæmu tilbaka. En öllum að óvörum þá sneru þeir aftur og um leið og stríðinu lauk fóru þeir í mál við fyrrum konur sínar og dómarana sem höfðu dæmt þá til dauða.

Dómstólinn komst að því að lögin væru kúgandi og óréttlát. En hinsvegar hefðu þau verið sett á réttan máta. Því var dómarinn sýknaður en konan dæmd fyrir misneytingu á því að nota sér kúgandi lög til að ná fram illgjörnum endi á hjónabandinu.

Í seinna málinu, sem kom til kasta dómstólanna aðeins seinna, fór fyrir Hæstarétt árið 1952, var komist að þeirri niðurstöðu að annaðhvort væri bæði eiginkonan og dómarinn sekur eða hvorugt, annað væri ekki hægt. Því að dómarinn hafði tekið mark á þessum lögum og ekki virt friðhelgi heimilisins né tjáningarfrelsið í raun. Maður á að hafa leyfi til að segja skoðanir sínar á sínu eigin heimili við sinn eigin maka. því hefði dómarinn í fyrra málinu og báðum í reynd verið saknæmur fyrir refsivert gáleysi í dómsúrskurði sínum. því bæri að dæma bæði eiginkonuna og dómarann fyrir frelsissviptingu og tilraun til mandráps á hermanninum.

JÁ KÖLD ERU KVENNARÁÐ ÉG SEGI EKKI  ANNAÐ!!!!!

Blondínur gera menn heimska!!!!!!!!!!!!

 Rakst á skemmtilega frétt í Aftonbladet, en þar greinir frá rannsókn sem gerð var í París. Í þeirri rannsókn kemur fram að menn koma fram við fólk eins og það telur að það sé. sbr. "Det här bevisar att människor som konfronteras med en stereotyp vanligtvis uppför sig i enlighet med den, säger Thierry Meyer, en av de forskare som lett studien."

Þannig að vilji maður eignast gáfaða kærustu þá er eins gott að horfa ekki á þessar ljóshærðu.   Dökk hærð, ljós hærð, dökk hærð, ljós hærð....

Eins og stendur í greininni, hvað kallarðu blondínu með tvær heilasellur? Ólétt blondína að sjálfsögðu.

En ein stúlka tjáði mér um daginn Blonde´s have mure fun. Sú er með mjög mikið ljóst hár, sagðist einu sinni hafa litað það dökkt og þá hafi bara kvenfólk reynt við hana.   Sú stúlka er reyndar alls ekki heimsk,reyndar bráðvel gefin, en ég verð kannski heimskur ef ég umgengst hana mikið. Þetta er erfitt líf. Jæja farinn að læra fyrir heimspekipróf sem er á morgunn.

Búinn að vera of lengi á þingi

Kolbrún Halldórsdóttir er að hefja sitt þriðja tímabil á þingi. En einhvern veginn spyr maður sig að því hvort að hún sé ekki búinn að vera of lengi. Er hún ekki bara kominn á endastöðina? Ég held að svo hljóti að vera. Allavega þegar þingmenn eru farnir að berjast gegn því að börn séu merkt á fæðingardeildinni, annars vegar stelpur með bleiku armbandi og strákar með bláu, þá er eitthvað mikið að. En hún er með fyrirspurn til heilbrigðisráðherra um þetta mál. Á ég virkilega að trúa því að stjórnarandstæðingar finni ekki merkilegri mál til að berjast fyrir og hafa eftirlit með. Það hlýtur að þýða bara eitt. Við erum auðsjáanlega með frábæra ríkisstjórn!!! Allavega að mati Kolbrúnar Halldórsdóttir hjá VG. Ekki get ég lesið neitt annað út úr þessari fyrirspurn hennar.

 

Þingmenn, vinsamlegast komið með alvöru mál til að berjast fyrir, hættið að eyða peningum skattborgaranna í bull og vitleysu.

Hercules og lögin

Dworkinn vill meina að í hverju máli fyrir sig sé til ein rétt regla. Kenning hans er Hippocrates en hann miðar við að Hercules finni ávallt réttu regluna í hverju máli, en hann gerir sér grein fyrir því að mennskir menn séu ekki eins og Hercules en við eigum hinsvegar að reyna að vera eins og Hercules.

Sýn Dworkins á dómarann er ekki eins og Hart, hann sér ekki dómarann sem einhvert opinbert bákn sem til vara búi til lagareglur, heldur sé dómarinn útvörður einstaklingsréttinda og réttinda minnihlutahópa.

Grunnurinn í hugmyndafræði Dworkins er að hafna því að lögin séu bara tæki til að ná pólitískum verkum, hann hafnar því í riti sínu taking rights seriously. Hann gerir skýrar grein á milli réttarfarslegum og þjóðfélagslegum markmiðum en hjá raunsæismönnum rennir þetta saman. Hvað eru þjóðfélagsleg markmið? Réttindi er það sem við eigum að líta til. Dworkinn hugsar alltaf um sig í dómarasætinu og ef þú ert dómari þá áttu ekki að hugsa um þjóðfélagsmarkmið, en þjóðfélagsmarkmið hvetur til málamiðlunar til að ná fram einhverskonar heildarhag. Við eigum ekki að meta reglur út frá því hver er hagkvæmnin af því, þannig að dómarinn á ekki að búa til reglur út frá hagkvæmni þjóðfélagsins.  Það kemur dómaranum ekkert við hvort að úrskurðurinn sé þjóðfélagslega hagkvæmur hann á að vera það staðfastur að dæma eftir lögunum og reglum laganna.